Tíminn ræður úrslitum

eftir Elísabet Erlendsdóttir

Hann hafði verið þreytulegur og fölur alla vikuna á undan. Kannski ekkert óeðlilegt við það enda miður nóvember. Það var kalt, morgnarnir orðnir dimmir og veturinn í þann mund að skella á. Ég vakna við að mamma kemur inn í herbergið mitt. „Andskotinn..” hugsaði ég. „Ég hef sofið yfir mig!”. Af tvennu illu hefði það verið skárri kosturinn. Móðir mín, sem virðist mér ávallt svo róleg og yfirveguð, hvíslar blíðlega: „Ástin mín, pabbi þinn fékk hjartaáfall og ég ætla að fara með honum suður. Getur þú komið systur þinni í skólann?”.

Með sjúkraflugi fór tæplega fimmtugur faðir minn á Landspítalann í Reykjavík og enn þann dag í dag þakka ég fyrir að veðurskilyrði hafi leyft lendingu sjúkraflugs í Reykjavík þennan morgun. Stundin þegar 18 ára unglingsstúlka áttar sig á því að foreldrar hennar, sem eru og verða hennar stoð og stytta í gegnum lífið, eru ekki gerð úr stáli er furðuleg að upplifa. Minningin hverfur mér allavegana seint úr minni.

Sömu skattar – sama velferðarkerfi

Reykjavíkurflugvöllur er varaflugvöllur fyrir Keflavíkurflugvöll, heimahöfn flugdeildar Landhelgisgæslu Íslands og gegnir lykilhlutverki í viðbragðsáætlunum Almannavarna vegna stórslysa og náttúruvár. Þá er Reykjavíkurflugvöllur miðstöð innanlandsflugs sem tengir landsbyggðina við ýmsa þjónustu, bæði opinbera og einkarekna, sem er þá ekki að nálgast í heimabyggð íbúa á landsbyggðinni. Flugvöllurinn er jafnframt endastöð sjúkraflugs en 1. desember síðastliðinn fór sjúkraflug Mýflugs í sitt sexhundraðasta flug á þessu ári. Um forgangsflutninga til Reykjavíkur hefur verið að ræða í 257 skipti þar sem tíminn fær að ráða úrslitum. Þessir einstaklingar borga líka skatta og eiga því rétt á sama velferðarkerfi og þeir sem búa svo vel að geta sótt lífsnauðsynlega heilbrigðisþjónustu í nánasta umhverfi.

Að opna eyrun og hlusta

Staðsetning Reykjavíkurflugvallar í Vatnsmýrinni er mjög umdeild og byggja ýmis rök stuðningsmenn lokunar flugvallarins á því hversu verðmætt landsvæðið er fyrir uppbyggingu borgarinnar. Ég geri mér grein fyrir því að það þurfi að byggja upp höfuðborgarsvæðið á hagkvæman hátt til að mæta áætlaðri íbúafjölgun, að það þurfi að þétta byggð ásamt því að auka sjálfbærni og samkeppnishæfni borgarinnar. Koma tímar, koma ráð – eflaust finnst hagkvæmari lausn sem hentar Íslandi öllu þegar á líður. En þar til sá tími kemur þætti mér vænt um að stuðningsmenn lokunar Reykjavíkurflugvallar myndu gera að minnsta kosti heiðarlega tilraun til að reyna að skilja hlið fólks á landsbyggðinni og hversu mikilvægur Reykjavíkurflugvöllur er okkur.

Elísabet Erlendsdóttir

Pistlahöfundur

Elísabet er með B.Sc. í rekstrarverkfræði frá Háskólann í Reykjavík, fædd og uppalin á Egilsstöðum. Hún starfar á sviði Viðskiptalausna hjá Advania en hennar helstu áhugamál eru nýjungar í tækni- og nýsköpunargeiranum og jafnréttismál. Hún situr í stjórn Ungra athafnakvenna og gegndi embætti formanns Stúdentafélags Háskólans í Reykjavík skólaárið 2015-2016.